Appari
e adurca li mossi
di l'ali nostri afflitti e sparacini
E' l'Ancilu di la Luci
pattu
lijami
finàita
jornu chi trasi
notti chi squagghia
E' canzuna senza palori
rivugghiu d'acqua
leccu di patri e di matri
ninfa
opali
farfalla
Si lu ciatu scarsìa
siddu cerca antichi oraculi
-nuvuli cu valigi d'ùmmira-
frica l' Ancilu picati
annaca muscalori
spini leva a una a una
e lu suli attrappa
cu rùfuli di ventu
e nassi di cristallu
Havi na luci sula
e un spaziu
e na manu di fogghia
chi ammutta lu russeddu
Nna lu nomi di Chiddu
chi duna uri e jorna
arriva
vistutu di virmigghiu e d'acquazzina
e li carri ci fannu di scorta
e li stiddi di curuna
D'intra di nui s'alliberta
lu primu chiantu
e ni scupremu tenniri
tenniri tenniri
e lu novu arrivatu
tuttu tuttu
n'agghicamu.

Si vuliti viaggiari, dici l'Ancilu,
nun tampasiati
a 'llimari calunii
a 'lliccari li firiti
a 'llustrari lu sistanti
racioppativi la trùscia
          e itivinni!
Viaggiari
è cuncertu di passi
marredda di strati
trippu di palori e silenziu
nasciri
pasciri
moriri
E' sfiziu macari
jelu na lu focu
chiarìa di ntenti e di luna
E' cuttuttu truppicuni.
La prima vela
nun jisa venti giusti
nun scanza la buriana
nun agguanta lu Nadir
Di la plaja janca
chi spartenza arrimodda
e ritorni,
comu vaetri di l'ali granni
vulamu allura
sicutannu li nostri sonnira
pi lu munnu:
munnu camunnu granaru e jardinu
munnu chi duna
scippa
scorda
Ma unni jamu e paramu
siddu la guerra carcarìa
la nnuccenza è sempri 'n-cruci
e lu celu…
lu celu pari nun n'ascuta?
Quali sorti
Ancilu
ni guverna?

Comu potemu, Ancilu, parrari
cu pipìtula di tempu
e di palora
nna la punta di la lingua?
E comu potemu midemma
nun parrari
siddu tòmiti di misteri
spànninu li toi rasti?
Avi radichi funnuti,
lu sonnu,
chi percianu lu cori
e lu cori
si sapi
è parabula di munnu
buatta di nnimmi
pagini bianchi
porti a banidduzza
e spinnu chi una
qualunchi di ssi porti
a l'ultimata
si grapi
e scoppi tu
Ancilu piatusu
e mbrigghi mazzamareddi e pinzeri
ncucchi manu e corpi
accordi virità e minzogni
Tu dici:
Lu sonnu è amurusa pruvidenza,
nna lu sonnu l'anima si spogghia,
di lu sonnu la morti s'ammanta
E quannu allura l' alba
-stidda chi abbatti lu scurùbbiu-
e chiù nun mpronta la lònira
tannu veni a diri
chi nun stamu durmennu
tannu veni a diri
chi nun stamu sunnannu
tannu veni a diri
chi nun stamu campannu.